Ac per Te ipse vel facile intelligere potes, Dilecte Fili, quanto animi Nostri dolore vel moerore potius, noscamus teterrimum sane bellum sanctissimae nostrae religioni in infelicis Italiae praesertim regionibus, a tenebrarum filiis nunc illatum qui pestiferis liberis, ephemeridibus, scholis ac pecuniae vi, aliisque nefariis omnis generis insidiis, et artibus, Italiae populos a catholico cultu avellere, illosque perniciosissimis quibusque erroribus inficere ac miserandum in modum corrumpere, et in summum aeternae salutis discrimen adducere, diabolica prorsus malitia, connituntur.

 Equidem si unquam alias, hisce praesertim asperrimis temporibus omnia sunt adhibenda consilia, et studia, ut adolescentes tot undique periculis ac nefariis inimicorum hominum insidiis misere circumventi a pravis illorum conatibus eripiantur, ac sanctissimis divinae nostrae religionis praeceptionibus sedulo imbuantur, et ad pietatem, honestatem omnemque virtutem diligentissime formentur.